Proyektong "English for All' ng Thailand, target ipatrabaho sa mga guro sa Pilipinas

Bumubuo ngayon ng proyektong 'English for All' ang Kingdom of Thailand para hasain sa ingles ang mga batang mag-aaral sa Bangkok at ang target nilang kuning magtuturo ay ang mga guro sa Pilipinas.

Ayon kay Secretary to the Minister of Education of Thailand M.L. Pariyada Diskul, mataas ang kanilang pagkilala sa mga Filipinong guro dahil sa ipinamamalas nitong galing sa pagtuturo ng wikang ingles.

“Your teachers are very diligent and blend in well with our culture,” sabi niya.

Sinabi pa niyang target nilang tumanggap ng paunang dalawang daang (200) mga guro sa Pilipinas sa pasimula ng kanilang programa.

Ang 'English for All program' na kanilang isinusulong ay malaking tulong umano sa mga batang mag-aaral na matuto ng ingles kahit sila ay nakatira sa rural na parte ng kanilang bansa.

“We want to recruit Filipino teachers to be placed in the Eastern Economic Corridor (EEC) government schools, which are the three provinces in the eastern side of Bangkok to upgrade the English competencies of the children in that area. I hope this will be the beginning of many other projects to come," dagdag ni Diskul.

Kamakailan ay nagpatawag ng isang inter-agency meeting si Thailand Minister of Education Dr. Teerakiat Jareonsettasin para pag-usapan ng Department of Education (DepEd), sa pamamagitan ng International Cooperation Office (ICO) nito at ng Minister of Education of Thailand ang mga detalye ng umano'y 'big project' ng Thailand para sa mga guro ng Pilipinas.

Ayon kay DepEd secretary Leonor Briones ay nagresulta umano ang pulong ng isang Memorandum of Agreement (MOA) tungkol sa government-to-government hiring ng mga kababayang Filipino.

Samantala, kinumpirma rin ni Briones na marami nang Filipino teachers ang kasalukuyang nagtatrabaho sa Thailand at ang iba pa umano ay mayroon lamang tourist visa na nagkakaroon na rin ng trabaho ngunit aniya niya ay hindi siya kampante sa datos.

“It’s not a plan, it’s not a policy proposal, it is an existing situation and if we can think, we can agree on a better way by which we can protect the Filipinos and at the same time, the Thai government, because it’s not able to regulate and it’s not able to keep track of all Filipinos who come,” she explained.

Para mapangalagaan ang kapakanan ng mga matatanggap na mga guro, magbibigay rin umano sila ng mga benepisyo ayon sa inilatag  na kasunduan, bukod pa rito, layon din nilang magkaroon ng “improve and promote” ng international professional exchanges sa pagitan ng dalawang bansa sa bisa ng MOU.

Kaakibat ng pangangalaga sa kapakanan at karapatan ng mga matatanggap na guro, sinabi rin ni  Briones na makikipag-ugnayan sila sa Professional Regulation Commission (PRC), Commission on Higher Education (CHED),Philippine Overseas Employment Agency (POEA), Overseas Workers Welfare Agency (OWWA), Department of Labor and Employment (DOLE), and the Department of Foreign Affairs (DFA).

Ang programa ay nakaayon rin umano sa batas, regulasyon at probisyon na sinusunod ng dalawang bansa.

Lubos naman ang pasasalamat ni Briones sa inisyatibong pinalawig ng Thailand, hindi lamang sa pagtulong sa mga gurong Filipino kundi para mas mapatibay pa ang ugnayan ng Pilipinas sa kanilang bansa.